975 53 510 (ikkje SMS) - For større tekst: Klikk CTRL+ post@skjaakhytteservice.no
Haust vart til vinter…

Haust vart til vinter…

Vi er i ferd med å legge oktober 2017 bak oss. Når vi gjekk inn i denne månaden, var det ikkje mykje att av dei fine haustfargene vi hadde i september.
Nysnø på toppane fekk vi òg…

Kan ikkje påstå at vi «aldri» har hatt finare haustfarger enn i år – men at dei var ekstra fine i år – det vågar eg å påstå.

Eg tek med nokre bileter, av årets haustfarger…

– Treng ikkje å gå lenger en litt utom hytteveggen…

I mine daglege oppdateringar under kategorien «Vêret i dag» har eg lagt ut ein del bilder av haustfargene.
Også på FB-sida til Skjåk Hytteservice.

– Breidalen, mot Oppljoseggje…

Det har ikkje vore mykje blogg-skriving dei siste månadene…
Men med fleire webkamera og vêrstasjonar, reknar eg med at dei fleste finn den info. dei treng, når det gjeld vêr og vêrforhold. Når ein lever eit stille liv, utan store utflukter, blir det ikkje så mykje «nytt» å skrive om.

– Også i haust tok eg fleire turar til Glåmbakktjønne…

Dora og eg har våre daglege lufteturar, men det blir stort sett i nærområdet. Fotoapparatet er også med, og på nokre av turane våre har eg hatt med eit gamalt bilete eller postkort. Har fått tilfredsstillt litt av hobbyen min, med å finne att «fotspora» til fotografar som har vore her før. Nokre har interesse av desse «før og nå» -bileta, men får ta det i eit eige innlegg – etter kvart.

– Fleire turar oppover Strynsfjellvegen, og innover langs Heillstuguvatnet…

– Eftastur til Kjostjønne…

Godt å sjå attende på fine haustfarger, utover vinteren…

I slutten av førre veke, tok vêrmeldingane, og media, til å melde om mykje nedbør og vind i helga som var. Litt spennande, når meldingane ligg på ca 0°. Vi ser svært ofte at det blir litt kaldare enn meldingane tilsi. Det vart litt regn og sludd, men også snø! Det meste kom i løpet av laurdag og sundag. Ved hytta vår hadde vi ca 20-25 cm sundag morgon. Måndag morgon hadde vi 48 cm. Meteorologisk institutt sin målestasjon registrerte 33 cm. Men heilt normalt at det brukar å vera meire snø her høgare oppe og lenger vest.
I dag har det vore litt regn og sludd, snøen ved snømålet ved Strynsfjellvegen (ved innkøyring til H2) hadde sokke til ca 30-32 cm no i kveld.

Mellom tette snøbyger laurdag, gløtta sola fram…

…Vuluvatnet ved Nysetra.

At vinteren kjem i oktober, her på fjellet, er nok heilt normalt. Nok at ein ser attende dei 10 siste åra, som viser at det er berre 2 av desse åra det ikkje har lagt seg snø, over fleire dagar, i oktober. Etter at det vart hytter her (1990), er det minst 4 år det har lagt seg så mykje snø at det ikkje har vore mogleg å køyre til hyttene frå slutten av oktober.

No går det litt om senn til ein kan ta fram skiene og nyte snøen og skiturar, noko ein del ser fram til. Nokre har allereie hatt sesongens fyrste skihelg på hytta.
Eg for min del skal gjerne «styre meg» nokre veker til…

Ha ei fin tid framover!

* * * * * * * * * * * * * * * * * * *

Blir vel ikkje filmstjerner denne gongen heller…

Blir vel ikkje filmstjerner denne gongen heller…

Septemberkveld i Hamsedalen – med røyk frå pipa i Ola-Bu.

Det sies at det er vanskeleg å spå, særleg om framtida; men når Mesta tek til å sette opp brøytestikk langs Rv15 over fjellet – da går det heilt sikkert mot vinter.

Stikking langs vegen er i gang!

Som før om åra undrar ein kvar sumaren vart av!
Eller – det som skulle vera sumar.
Korkje juli

eller august

overgjekk tidlegare år når det gjeld sumarvarme, slik vi drøymer om når sumaren kjem.
Men vi skal ikkje klage – vi har hatt mange fine dagar i år òg!

«Kva skal eg med dette…?»
Som dei fleste sikkert har lagt merke til, «samlar» eg på vêrdata og bileter for å samanligne år for år. – Ja, jamvel bileter som kan vera 100 år gamle samlar eg på, og prøvar å finne att staden og motivet, for å ta nytt bilete.
Eg merkar at det er ikkje så mange andre som har interesse av dette, og ofte tenkjer eg òg: «Kva skal eg med dette…?»

«Brukar det å ligge snø i Grotli, denne tida?»
Men… I sumar fekk Tor ein telefon frå eit norsk filmselskap, som ringte på vegne av eit koreansk filmteam. Dei skal gjera opptak til ein film. Datoane er allereie bestemt, og spørsmålet var m.a.: «Brukar det å ligge snø i Grotli denne tida? Korleis er vêret denne tida?»
For nokre dagar sidan var ein norsk og to koreanske representantar her i Grotli. Tor var med dei, og viste dei rundt. Og eg møtte dei med PC’n min, og synte dei bileter frå desse datoane, frå åra 2008-2016. I tillegg tok eg med utskrift av vêrdata eg har samla frå Meteorologisk institutt sin målestasjon i Grotli, frå same tidsrom som dei eventuelt skal gjera opptak.
At det på over 50% av bileta var snø, det var positivt. Men dei koreanske representantane sa «Brrrr…», og kulsa seg, når eg synte dei at det har vore ned mot -20° her, denne tida òg…
Om dei kjem til å velge Grotli for opptak til filmen – det står att å sjå! Men eg fekk, i det minste, nytte av bileta og notata eg samlar på.
Det blir uansett ikkje noko filmrolle på meg eller Dora! Hunden som skal vera med på opptaka skal vera av ei heilt anna rase, og dei hadde allereie helsa på ei potensiell «filmstjerne» av rasa i Oslo. Heilt OK for meg og Dora!
Men det blir spennande å sjå kvar i Noreg dei vel å gjera opptaka til filmen. Dei hadde 2-3 andre potensielle stader òg, utanom Grotli. 
Men – det er lov å håpe! Andre som har fått mine vêrrapportar for bestemte perioder, har valgt Grotli for opptak. 

Vinterførebuing…
Skjåk Hytteservice har så smått teke til å førebu seg på vinteren.
Ein del har allereie bestilt, og fått levert, vinterved.
Behovet for kva ein må ha på lager, har endra seg litt med åra. No er det mange som har montert Jets-anlegg på hyttene, og Tor har og belaga seg på eit bra lager av frostvæske til Jets-anlegga, for dei som ynskjer å kjøpe.

For nokre dagar sidan hadde vi montør her, som skifta ut webkamera mot Skridulaupen. No kan ein sjå vêret og dei fine haustfargene som naturen byr på no i tida framover, frå 3 webkamera her i Grotli!
  

Hausten byr òg på nokre «tradisjonar» for hyttefolket: Haustmøter / årsmøter.
Breidablikk hadde sitt haustmøte/årsmøte førre helg.
Grotli Hyttegrend skal ha årsmøte komande helg, med kurs i bruk av hjertestarter (den kom på plass like over påske), årsmøte og dugnad (sjå info. på heimesida til Grotli hytteforeining).
Etter det eg kjenner til, skal Grotli Fritidsboligområde (Grotli Fjellhytter) ha sitt haustmøte neste helg.

Hausten er ofte ei fin tid, her på fjellet!
Nyt den!

Ynskjer alle ei fin helg!

* * * * * * * * * * * * * * * * *

Ein for alle – alle for ein.

Ein for alle – alle for ein.

Det kjennes litt haustleg ut. Juli vart ikkje så varm som vi hadde håpa på, og varmen vi drøymde om å få i august – den har også uteblitt. Slik har det vel, stort sett, vore over «det heile».

Men – i dag er det ikkje vêret som opptek meg mest.
Blir berre så frustrert over å sjå, og erfare, kor nyttelaust det er, det ein driv på med!
Ein del «hungrar» etter informasjon (sjølv er eg ein av dei), medan andre let att auger og øyro, og vil gjera som dei sjølve vil. Enkelte gonger kan ein lure på om folk har lese forskrifter, bestemmelser, vedtekter, lover og regler…
Ein del ting får vi spørsmål om, ein del anna blir vi bett om å informere om. Vi prøvar å informere så godt vi kan. Det kan føre til at nokon skuldar oss for å vera «overvakings-politi».

Det siste no er (nok ein gong) søppelcontainerane!
Kor mange gonger det har vore tema – det veit eg ikkje! Men det ser ut til at folk stadig «gløymer» kva dei skal brukast til – eller rett og slett «gjev blanke f**». Det blir stadigt lagt ting i containerane som ikkje høyrer til der! Noko som går ut over alle brukarar som betaler renovasjonsavgift på hyttene sine.
– Arkivbilete frå september 2015. Men – har vi lært på desse åra…? 

Skjåk Hytteservice har tilsyn med søppelcontainerane som er til bruk for hyttefolket, på strekninga Billingen – Breidalen (Breidablikk). Det vil si: mellom anna sjekke når det er tid for tøming, og på vinteren rydde bort snø.
Dette gjer Skjåk Hytteservice for Skjåk kommune. Dermed er det også naturleg at dei ber oss ta ein del av informasjonen vedr. containerane.

Slik oppslag, eller lignande, er det på alle containere:

«Ein for alle – alle for ein»
Eg forstår godt at renovatøren går lei av å lempe ting, som ikkje høyrer til i ein container, ut av containeren! Noko som også fører til ekstra turar for henting/levering – som på nytt kan føre til auka renovasjonsavgift, – for alle.
No er det slik at ein av containerane i Grotli Hyttegrend ikkje blir tømt før ein stor TV som ligg der blir fjerna!
Eigaren av TV’n bør/må snarast fjerne den, og ikkje la andre ta «støyten»!
Kjedeleg at renovatøren må gå til slike tiltak, men vi får håpe at folk lærer, før det same blir iverksatt ved fleire containere!
Uansett kva tiltak som blir gjort – så lenge folk ikkje lærer, går det ut over alle!
Det blir «ein for alle – alle for ein», om ein føler det er rettferdig eller ikkje…

Håpar det er siste gongen vi behøver å ta opp dette tema!

No vil vi heller nyte siste rest av ein (eventuell) sumar!

* * * * * * * * * * * * * * * * * * * * * * * * *

Sumar – med sine gleder og bekymringer…

Sumar – med sine gleder og bekymringer…

Vi venta lenge på sumar og sumarvêr!
Det var litt sjokkerande å oppdage at den 17. juli hadde vi nøyaktig same makstemperatur som den 20. desember -16! Nemleg 8,3 plussgrader. Rett nok meir unormalt den 20. desember enn 17. juli, her på høgfjellet – men like vel…

Men så – den 19. juli kom sumarvarmen og finvêret!
Nokre dagar med strålande sol og temperatur over 20 grader! Det kjennes godt ut.
Men det vart ikkje sett nokon varmerekord, og det står framleis att å sjå om juli «kvalifiserar» seg til å bli kalla sumarmånad, med gjennomsnittstemperatur på minst 10 grader. Pr. i dag ligg gjennomsnittstemperaturen for juli på 8,9 grader…

– Framover Hamsedalen, mot 3. og 2. vatnet…

Når det gjeld varmerekord…
Grotli målestasjon vart sett i drift 1. oktober 2008.
Den 24. juli 2014 vart det målt 26,0 grader. Det er den høgste temperaturen målt – hittil.

Som før nemt har Tor vore to turar i Finnmark i sumar. Ingen av dei nokon ferietur. Men like vel «godt» at han fekk teke desse turane.
Derfor var det ekstra fortjent med fisketur til Ola-Bu sist helg! Om ikkje fiskelykka var heilt på topp, så var vêret på topp, og dei fekk ei fin langhelg i Hamsedalen!

– Ved 4. vatnet i Hamsedalen… 

Og eg – som «hytteservice-vikar» når han var på desse turane, fekk mellom anna prøve meg på «ting eg ikkje kan»! Tor er vaktmester/kontaktpersom når det gjeld målestasjonen til Meteorologisk institutt. Innrømmer at eg vart «litt skjelven» når det kom oppdrag derifrå, men med hjelp og veiledning fekk vi Grotli målestasjon opp på sida til Yr.no att.

Regn og torden.
I går efta var det varsla regn og torden over store delar av austlandet. Her oppe i fjellheimen gjekk vi lenge fri, men litt før midnatt kom dei fyrste tordenbraka og regnet.


I løpet av natta kom det ca 20 mm. Det er ikkje meire enn det fleire stader fekk i løpet av ein time. Det er nok ein grunn til at det heiter seg at «i Skjåk er det like tørt som i Sahara». Nedbørsfattig bygd, sjølv om vi som bur her ikkje alltid føler det slik.
Men lyn og torden kan lage problem i diverse elektronikk, også på hyttene!
Vi får meire og meire moderne utstyr rundt oss, sjølv på enkle lågstandard-hytter.

Så – kva gjer ein, når elektronikken i eit Jets-anlegget blir øydelagt?
Fortvila hytteeigar med dette problemet, etter nattas torevêr, ringde til Tor i dag. Vanlegvis tek det fleire dagar å få tak i nye delar, og få skifta dei.
Tor er ingen tryllekunstner som kan fikse «alt», men når han tidlegare har solgt utstyret der, hjelper han kundane sine så godt han kan – for at dei skal sleppe å avbryte hytteopphaldet på grunn av problem som oppstår.
Slik vart det i dag òg. Improvisert løysing på problemet (skifte av den øydelagde delen), og hyttefolket kunne fortsette hytteferien!
Vi får håpe at det ikkje har oppstått problem med straum og elektronikk på fleire hytter, etter uvêret!

Som før om åra er eg svak for kveldshimmelen som fotomotiv…

Ha ein fortsatt fin sumar!

* * * * * * * * * * * * * * * * * * *

Fråværsmelding – og litt frå kvardagen i fjellheimen…

Fråværsmelding – og litt frå kvardagen i fjellheimen…

Juli og sumar!
Kalenderen seier at det er slik – men her på fjellet har vi ikkje merka mykje til sumarvarmen enno.
Men – vi er optimistar!
Sparken har fått sumarferie…
…så får vi sjå om blomane blir mat for sauene som er observert i området, eller ikkje.

Vi får håpe at juli oppfyller «kravet», med minst 10 grader i gjennomsnitt, til å bli kalla sumarmånad.
Hittil ser det heller dårleg ut. Skal juli rekke det, trengs det snart ei varmeperiode!
Men slik sett er det ikkje kvart år vi har hatt sumar, her på fjellet, med månader med over 10 grader i gjennomsnitt. Medan andre år har middeltemperaturen vore over 10 grader i både juli og august.
Men sumar er det – uansett, og godt er det!

I fjellet er det framleis mykje snø for årstida, og på ein del fjellvatn ligg det framleis is.
I slutten av juni fekk vi òg eit par netter med minusgrader – og nysnø langt nedover fjellsidene.
Men med morgonsol og blikkstille vatn, gløymer ein at det hadde vore ynskjeleg med litt mindre snø, og litt mildare – slik som når ein ser dette:
– Vestover Breidalen, Breidalsvatnet og nokre av Skjåk sine fine fjell!

Fråvær:
Tor kjem til å bli bortreist nokre dagar,
frå og med onsdag 12. juli, til måndag 17. juli.
Desse dagane kan han òg vera vanskeleg å nå på telefon.
Alle er vant med at Tor «alltid» er tilgjengeleg, noko han òg ynskjer å vera. Men ei lang reise for å ta eit siste farvel med nokon av sine næraste, kan vera tungt.
Derfor ber vi:
Dersom det ikkje er noko som hastar, ber vi dykk vente med å ta kontakt til han er heime att.
Men dersom det er noko eg (Anna) kan svare på, eller hjelpe med;
ta gjerne kontakt med meg på tlf.: 97553511.

Elles går livet i fjellheimen sin vante gang.
Med snikkering/vedlikehald, både her i området og litt elles. Mellom anna er det nokre som skal montere Jets-anlegg på hyttene sine, og som støttar Skjåk Hytteservice ved å handle gjennom oss. Det set vi stor pris på!
Nokre har fått tankar og anlegg levert på hytta si, andre får etter kvart som det er klart for montering hjå dei.

Den kvite snøen og månen lyser opp…

…sjølv om nettene tek til å bli litt mørkare.

Ynskjer alle ein fortsatt fin sumar !!! 

 

  • * * * * * * * * * * * * * * * * * *

Pin It on Pinterest