975 53 510 (ikkje SMS) - For større tekst: Klikk CTRL+ post@skjaakhytteservice.no
Før: Seterysteri – No: Seterpensjonat.

Før: Seterysteri – No: Seterpensjonat.

Alltid spennande når det skjer noko nytt i bygda!
Billingen Seterpensjonat vart offisiellt opna 1. juli i år.
inngang billingen seterpensjonat
Huset er eit gamalt tømmerhus, som vart flytta frå Ramstadstronda til Billingen i løpet av 2013/2014.
Her kan ein få servert mat, kaffe og ”biteti” (kaker) – og drikke av ”alle slag” .
I 2. etasje er det rom for overnatting. billingen seterpensjonat
Ein fin og triveleg stad for å ha ”kalas” (selskap) er det òg, dersom det er noko spesiellt ein vil feire.
Billingen Seterpensjonat er òg eit fint utgangspunkt for fjellturar, jakt og fiske.
turstigar billingen

 

Gamle postkort.
Mi interesse for gamle postkort og bileter blir berre større, når ein ser korleis stader og bygningar har endra seg. Opp gjennom tidene har dette seterområdet vore nytta som motiv på mange postkort. I mi samling har eg nokre. Mellom anna den gamle utleggsbrua…
billingen tora elv…fossen og elva som brusar forbi.

billingen ysteri m bruFrå 1919, til ut på 1930-talet, var det seterysteri i huset som stod her.
billingen ysteri
Etter at det vart slutt på ysteri, vart bygningen nytta som kafè, i ein del år.

Men, som så mykje anna, har staden endra seg.
I 1953 vart ysteri-bygningen teken ned. Berre ystbua stod att, og vart nytta mest som ”dagshytte”.
Når heilårsvegen vart bygd gjennom Billingsdalen, vart det ny bru over elva Tora, og vegen vart lagt utanom området der det før var ysteri.

I 2013 tok eg ein del nye bileter av stader eg hadde gamle postkort frå. ”Billingen Seterysteri” såg da slik ut:
billingen ystbuaDet var berre den gamle ystbua som stod der. Men den vart òg rivi seinare på året. Førebuingane til ”Billingen Seterpensjonat” tok til!

Den gamle ysteribygningen ”lever” framleis.
Men kva med den gamle ysteribygningen, som vart teken ned i 1953?
Den kjøpte Trio Tamreinlag, og sette opp att i Hamsevika. Den har gått under namna ”Reinshytta”, ”Gjetarhytta” og ”Slakteriet”, da den mellom anna vart nytta når Trio Tamreinlag dreiv reinsslakting.
Her er eit bilete av hytta (tidlegare ysteriet), teke ca 1955, i Hamsevika.
reinshytta
Eit firma kjøpte den for ein del år sidan, og brukar den som firmahytte.
gamle ysterietHytta står framleis, men med store endringar og ombyggingar.

– – – –

Det var, stutt fortalt, historia om staden som i 1919 vart Seterysteri – og i 2015 Seterpensjonat.
Hittil har vi vore der to gonger i sumar – og kan anbefale staden! Triveleg er det der, og god mat blir servert! Og dersom du er ekstra heldig – tek vertskapet, Marianne og Arnstein, fram toradaren sin og underheld gjestane sine!
billingen seterpensjonat inne
Ynskjer Marianne og Arnstein LYKKE TIL med Billingen Seterpensjonat!

* * * * * * * * * * * *

På ein grå og regntung dag…

På ein grå og regntung dag…

…som dagen i dag, er det best å sitte inne. Heller tenke på sol og varme…
Mange klagar over denne sumarvarmen – som uteblir. ”Alle” har det verste vêret. Men Yr.no bekreftar kven som hadde det verst/kaldast i natt:

temp 21.07.15

Sumar er mellom anna tid for ute-arrangement.
Sist laurdag var tida for seterkonsert på Åsen. Med ei og anna regnbyga på dagen, var det spennande korleis vêret ville bli om kvelden…
Men det vart opphaldsvêr under heile konserten, og mykje folk hadde møtt opp.
Det var berre å nyte fin og god underhaldning! Ein svært triveleg kveld vart det!
Litt kjøleg, men med ekstra klær gjekk det heilt fint. Og når ein får servert ein god og varm kaffekopp, og biteti, i pausa – det varma ekstra.
seterkonsertTriveleg var det òg å treffe folk ein sjeldan treffer og pratar med elles.
Litt morosamt var det òg med trivelege attendemeldingar på FB-sida, den nye heimesida og bloggen til hytt’sørvisen! Tusen takk!
Og til deg som etterlyste dei gamle heimesidene:
Primstaven kan du framleis finne ved å klikke her – historia om Ola-Bu i Hamsedalen ligg her.
Eg har ikkje overført/laga nye sider frå den gamle heimesida enno, men har fått oppskrift på korleis eg kan gjera det. Kanskje blir det haust- og vinter-arbeidet mitt? Vi får sjå… Eg har så mange planar og ”jern i ilden”…

At mange likar seg her på fjellet, og kjem att år etter år, er triveleg!
Men når dei som ”angreip” oss i 2007 kjem att – det er mindre triveleg!     larveangrep 2007(Utklypp frå GD, 6. juli 2007. Klikk på biletet for større versjon)
Det er ein del larver (åmer) på bjørka i hytteområdet att i år, men ikkje så stort omfang som sist (enno?). Pedersen, som var her og såg på angrepet i 2007, har fått nokre bileter frå meg dei siste dagane. Han trur at det er same slag; stor haustmålar. Dersom han får anledning, vil han ta ein tur og undersøke nærare.
Det er vel helst ikkje for slike hendingar vi ynskjer at området vårt skal bli lagt merke til – men vi får håpe at alt det positive veg opp for det negative!

Ha ein fortsatt fin dag – gjer det beste ut av den – uansett vêr!

* * * * * * * * * *
* * * * * * * * * *

Det kallast midtsumar…

Det kallast midtsumar…

…med regnbyger, lågt skydekke, nysnø på toppane og temperatur rundt 5°.
Midtsumardagen kjem midt mellom sumardagen (14. april) og vinterdagen (14. oktober), og kalenderen fortel at midsumardagen var for to dagar sidan (14. juli).
Men det kjennes ikkje slik ut…
Juli kom med varme dei fyrste dagane – vi optimistar fekk kanskje falske forhåpningar…

Men dagane går sin gang.
I hytteområda er det ein del aktivitet no. Nokon bygger på hytta, hjå andre er det tid for vedlikehald. Det er så rart med det, etter ca 20-25 år kan det vera eit og anna som må skiftast… Og atter andre ynskjer å modernisere litt.

Dei siste åra er det m.a. ein del som har montert Jets-toalet i hytta si. Skjåk Hytteservice er forhandlar for Jets, og fyrst i denne veka vart siste bestilling levert her på fjellet:Jets-tankar Men no har dei endra forma på tankane (før var dei runde). Mykje meir upraktiske tankar no, meinar Tor, både å frakte og grave ned. Men det går, det òg!
Han skal i vertfall sleppe å ”plundre” med den slag til vår hytte. Så lenge muldoen fungerar, eg får behalde dobbeltstemma mi og EG ber inn vatnet, blir det nok ikkje slik do her. I mine argument mot jets-do har eg fleire gonger sett opp reknestykke på kor mykje vatn som trengs til den i vårt tilfelle. Minst 2000 liter pr. år, kjem eg fram til. Her i Grotli Hyttegrend har vi ikkje lov til å legge inn vatn, heller ikkje føre inn vatn med slange provisorisk. Nei, sååå glad i å bera inn vatn er ikkje EG, at eg ber inn for å tømme ”rett i do”.
Men – ein skal aldri si ”aldri”. Kanskje om nokre år – når vi har fått oss annan bolig her på fjellet, og ikkje brukar hytta så mykje – kanskje eg endrar meining da?

Laurdagskvelden er det Seterkonsert på Billingen (klikk på biletet for å sjå stor plakat).
seterkonsert billingen 2015Konsertane som har vore før om åra har vore til å anbefale! Får håpe at dei har vore i forhandling med vêrgudane, og kome fram til ei god avtale om vêret òg!

Trass regn og lite sumarvarme – lufteturar må vi ha!
luftetur i regnver 16.07.15Da gjeld det å kle seg etter vêret, både for to- og fir-beinte.
Ein må ta vêret som det kjem – og gjera det beste ut av det…

* * * * * *

Juli kom med sumaren!

Juli kom med sumaren!

Dei fyrste dagane med sol og varme – som fekk fart på snøsmeltinga! Og nok av snø var det å ta av i fjellet, etter denne kjølege våren.
Når ein ser på data frå Meteorologisk institutt sin målestasjon på ”Gamle-Grotli” (Grotli Fjellstue), som har vore i drift sidan hausten 2008, stemmer det vi har følt – det har vore ein kjøleg vår!middeltemp -Den kjølegaste våren dei siste 7 åra! Det har vel vore sagt at: ”Etter 7 gode år, kjem 7 dårlege år..”. Vi får håpe at dette ikkje er starten på 7 dårlege!

Desse dagane med sol og varme førte til at bekkar og elver gjekk flaumstore. Her er eit bilete frå den øverste hengebrua over Måråe:måråe øvre hengebru 03.07.15

Og den nederste hengebrua over Måråe:måråe nedre hengebru 03.07.15

No dei siste dagane har vi hatt regn, og kjøleg vêr.

Det vart litt sumarblomar ute hjå meg i år òg. Eg ”må ha” litt blomar ved inngangen… Men det blir ”stusslege greier” når ein ikkje får planta før siste dagane i juni, om lag ein månad etter alle andre. Og kva slag blomar kan overleve ei sumarnatt, der temperaturen kan koma under 0°? Men nokre sjanser må ein ta…!sumarblomst

Vi må ha trua på at sumarvarmen kjem att – og at vi får ein lang og fin sumar!

rose sumarhåp

* * * * * *

Ein sumarkveld i båtnaustet – med «mykjy lys og mykjy varme»…

Ein sumarkveld i båtnaustet – med «mykjy lys og mykjy varme»…

No for tida skal alt vera ei «oppleving» og litt spesiellt.
Den som ikkje har vore på ei tilstellning i Grotli-naustet ved Breidalsvatnet har gått glipp av ei spesiell oppleving, vil eg påstå! Om vinteren husar det båt, men i 2011 starta hotellet med «sumarope» nokre kveldar.
Det vart sitteplassar, enkel matservering og bar. Verkeleg ein stad ein kunne sitte, prate og ha det triveleg i sosialt samver. Det har det òg vore dei siste somrane.

Sist laurdag (27. juni) opna Grotli Høyfjellshotel båtnaustet att, for fyrste gong i år, og med ein stor haug med kvist som skulle brennast like ved, vart det kombinert med forsinka St. Hans-feiring! Og vêrgudane var samarbeidsvillige, og i godt lune, denne kvelden.
Berit er heilt makalaus til å skape trivsel, med mykje ljos og varme! Eg trur ho må ha ein spesiell «tryllestav» ho går rundt med… 01 båtnaust, Breidalsvatnet, Grotli…som ho lagar den gode og lune stemninga med, over allt! Her er båtnaustet ferdigpynta til gjestane kjem.
Vegg i vegg med båtnaustet ligg ei gamme, der det òg er sitteplassar.
NB: Når eg tok dette biletet i gamma, hadde ikkje Berit vore der med «tryllestaven» sin enno.
02 gamme, Breidalsvatnet, GrotliMen i gamma vart det òg «ljos og varme», og reinsskinn og puter til å sitte på.

På uteområdet låg det tepper og puter til å sitte på…
05 b båtnaust, Breidalsvatnet, Grotli…og bålplass og bålpanne.

04 b båtnaust, Breidalsvatnet, Grotli
Folk kosa seg, både ute og inne. Og fiskesuppa fekk mykje velfortjent ros! 03 båtnaust, Breidalsvatnet, Grotli

Når vi gjekk for å tenne bålet, stod sola lågt i vest over Breidalsvatnet – i skaret innover til Hamsedalen…
06 b båtnaust, Breidalsvatnet, Grotli

Over kvite og mektige Skridulaupen i sør kom også månen fram, og vart med på feiringa. 07 b båtnaust, Breidalsvatnet, Grotli
Mot nord har vi Krosshø, der det òg framleis ligg mykje snø. 08 b båtnaust, Breidalsvatnet, Grotli

Det vart ein fin og stemningsfull kveld.
Og den som ville; kunne òg få kjøpt litt ”stemningsskapande” i baren…09 b båtnaust, Breidalsvatnet, Grotli
Når vi rusla heimatt, litt før midnatt, hadde sola gått ned.10 b båtnaust, Breidalsvatnet, GrotliMen kveldshimmelen i vest lova finvêr neste dag – og slik vart det!

Tusen takk til Grotli Høyfjellshotel, ved Berit og Are, som laga denne fine kvelden for oss!
Neste gong får vi håpe at enno fleire veit å sette pris på eit slikt tilbod, og tek seg ein tur! Både hyttefolk og andre…

…..

Dette innlegget skulle eigentleg vore ute før, det tek til å bli nokre dagar sidan St. Hans-feiringa. Men… – For det fyrste var eg litt treg til å forfatte blogginnlegget. – Og for det andre har radiobreibandet vore nede. Dermed vart det som det vart.

Ynskjer dykk alle ei fortsatt fin veke!

* * * * * *

Pin It on Pinterest